9, ఆగస్టు 2017, బుధవారం

జగ మిది కలయా ఒక చక్కని నిజమా


జగ మిది కలయా ఒక చక్కని నిజమా
తగు సమాధానము దయచేయ వయ్యా

కలయైనచో మరి కనులు తెరచి నేనేడ
కలగానిచో రేపు కనులు మూసి నేనేడ
విలువైన వివరము వినిపించవే
చెలుడా యిది నీవు కాక చెప్పేదెవరయ్యా

కలలలో పలుతావుల పలురూపుల నుందునే
అలలవలె మంచిచెడులు కలిగి మలగుచుండునే
చెలికాడ తెలుపవే యిలపై నాకు
కలుగు జన్మములు పెద్ద కలలోని సంగతులా

కలయందువా ఈ కల నీదో నాదేనో
కలకానిచో నా కలరూపు కథయేదో
చెలికాడ యికనైన దయచూపవే
తెలుపవే కల్లనిజము తీయతీయగా నీవు

6 వ్యాఖ్యలు:



  1. కలయో నిజమో యనుచు
    న్నిలలో తహతహ జిలేబి నీల్గుడదేలా !
    వలలో పడినావు గదా
    సలసల కాగెడు చమురిక సరి సరి మనకే !

    జిలేబి

    ప్రత్యుత్తరంతొలగించు
    ప్రత్యుత్తరాలు
    1. దయచేసి యిలాంటి అవకతవక పద్యాలను ఇక్కడ వ్యాఖ్యలుగా వ్రాయకండి. ప్రచురించలేను.

      తొలగించు
  2. కల యిది వరమిది
    కల నిజమౌనో కాదో నను కలవరమిది
    కలని నిజము చేసి
    కలవరము - ప్రభు! బాపవయా

    ప్రత్యుత్తరంతొలగించు
    ప్రత్యుత్తరాలు
    1. చక్కగా చెప్పారు. ఈ జగత్తు అంతా దేవుని కల అని ఒకరు చమత్కరించారు. మనకు సంబంధించి జగత్తు సత్యం - అలా అనుభూతం అవుతూ ఉంది కాబట్టి. శంకరులైతే విశ్వం దర్పణదృశ్యమాననగరీ తుల్యం అన్నారు. అసలు సంగతేమిటో అయనకే యెఱుక. అందుకే ప్రశ్నవేయటం.

      తొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.