25, సెప్టెంబర్ 2016, ఆదివారం

మానరాని ప్రయాణము



మంచిరోజు చూడకయే మనిషిచేయు ప్రయాణము
మంచిచెడుల నెంచరాని మానరాని ప్రయాణము

పాపాత్ముడు పుణ్యాత్ముడు పండితోత్తముడు శుంఠ
శాపోపహతు డదృష్టజాతకుడు విరాగి
కోపదారి శాంతమతి గుణవంతుడు ప్రతివాడు
నీ పయనము చేయుటకే యిచట వేచియుండును
మంచిరోజు

పనిగొని తా మంచిచెడుగులను చూచి జనించడు
మనసారగ పంచాంగము కనుగొని మరణించడు
మనుజులకు రాకపోకలను కాలము గణించును
కనుక వచ్చిపడిననవాడు కదల వేచియుండును
మంచిరోజు

ఈరాకలుపోక లింక నెందుకని యెంచువాడు
పోరాడిన ఫలములేదు పొగిలినను ఫలములేదు
దారివేరొండు లేమి యారసి చిత్తంబున
శ్రీరామునిపాదములను చింతించవలె నింక
మంచిరోజు