9, ఆగస్టు 2012, గురువారం

ఇంత గొప్ప సృష్టి జేసి యిందు మమ్ముంచితివి

ఇంత గొప్ప సృష్టి జేసి యిందు మమ్ముంచితివి
యెంత తిరిగినా దీని నెఱుగ శక్యము కాదు

తగుల కుండ జీవుడు తాను తగిన దూర ముండ డేని
తగులు కొని దీని వింతల దారి తప్పి పోవు నాయె
విగతరాగబుధ్ధి యగుచో వింత లెల్ల తడిమి చూడ
తగునటన్న నీసృష్టి తాత్పర్యం బేమి గలదు

ఒక్క సారి తెలియక వచ్చి చిక్కు పడిన వారి సంఖ్య
లెక్క జెప్ప నెవ్వరి తరము చక్కగ జేసితివి సృష్టి
అక్కట యణువణువున దోచు నట్టి నీ విభూతి నెఱుగు
మిక్కిలి భక్తులకు నిచట మెలగవచ్చు నొరుల వశమె

నీవు నేను బేధము లేక నిశ్చయముగ నొకటి గాన
నీ వినోద పూర్ణ విశ్వము నెల్ల జూచి వచ్చు చుంటి
నే విహారమైనను రామ యెడదకు రుచియించునే
నీ వలన నుండుటె నాకు కావలసిన సుఖము గాన